METRAILETEN MUGAK

        Hedoi Etxarte , 2008

 

 

Foucaultentzat

erresistentzia, delitugintza, lege-hausteak eta, beraz,

transgresio mota guztiak bi helbururen zerbitzura daude:

lehenik, sistemaren baitan gorpuztea

honen boterea berresteko;

bigarrenik, sistemari bere halabeharrezkotasunarengatik

ezgizatiartasuna egoztea.

 

                                        Musical elaborations

                                        EDWARD W. SAID

 

 

Ohartzean mugak hori bihurtu dira

                eta hegaztiek

eta karratutzen diren gurutzeek

iragan beroa dute helburu

gaurra biharamun ahoskatuz

 

ezagutuko banitu praka leunetan galdutako masailak

              larru-gerrikoz

eta axota poltsikotik aterako dut

    eta gerrian sartuko: zuri

    tinta odolaz ordezkatuko dizut: beltz

 

falta dena falta dela

kotoizko koltxoiek jan nazatela

kiwiak tixertetan behera begira daude

saiatuta ere borobilak

ezin dira laukitu

                                                    ezintasuna:

                                          biderdiko zura tiraderan

                                                    argibideak:

                                            metraileten lagun on

 

zer du gaur lurrazpiak?

zerk du gelditzen? zerk zikintzen?

betaurrekoak dira sudurzaleenak

eta sudurrak gereziondozaleenak

 

                                            estatu autoritarioa

                                                  ez da deus

                                                egutegi barik

 

nire burua zartatzea irtenbide

zikintzeko barandilak hari eta arantzez

egunkariak berridazteko

itxaroten egongo ez bagina

ahaztutako zelai-isla

utzi isiltasuna lurrean

eta lurzoru margotu berriekin

                                    zikinduko dira oinak

irudi garraxituak begipean margotzen

eta nik ez dut nahi hain arin

gugandik alde egin

 

© Hedoi Etxarte