EGUTEGI BERRIA

        Jose Inazio Lasa , 2012

Bidalidazu egutegi berri bat

denboraren hondar zimurrik gabea,

jauziz betea,

unibertsoa zabaltzen duten atez josia.

Aska nazazu zeure ezpataz

ametsa erakartzen duen arrastotik,

komenientziazko bidezidorretatik,

mundua ixten duten lurrinetatik.

Arima bilatzeko ezinegonean

ordezka nazazu,

jaso nire eroraldiak

eta bota espirituaren ezkaratzera;

ordezka nazazu bizitzaren urrezko

hariak sortzeko lanean.

© Jose Inazio Lasa