BILBO

        Martin Etxeberria , 1999

Enekuriko gaina igo eta Getxorako

bidea hartu,

irratia ere piztu gabe.

Barrua

gaizki frijitutako sanjakobo baten

barrualdea bezain hotza

sentituz.

Goizeko bostak.

Arratsalde laburrak gero,

musikarik gabeko koloreei begira.

Nire ihesaren zirriborroak

patriketan gordetzen,

mukiz egindako kaioek

nire mixeria atzeman ez dezaten.

Eta bihar, atzera berriz dena.

Oinik gabeko elurroldea;

iragana etorkizunarekin

larrutan.

Balkoiko butanontziari

eguzkiak nola ematen dion ikusiz,

bertara joan eta

zerutik eroritako bular hori

laztantzeko gogoa

besterik ez zait sortzen.

© Martin Etxeberria