EZKUTALEKUA

        Xabi Borda , 2009

bestela

lokarriak ebakitzeko aiztoak

non gorde ez nuke izango

agerian daude ezkutalekuak

kaxoiak atera eta leizeak zabaltzen dira

estalaktita bihurtu gezurrak

oraindik idazteko dauden mezuak hormetan

argiztaturik turisten gozamenerako

agerian daude ezkutalekuak

komuneko koraletara jaitsi dira

urpekariak kamerak eskuan

kamuflaje koloreak galdu ditugun

arrain exotikoen bila

agerian daude ezkutalekuak

ganbarako oihanean trapu zaharrak

lehoi bat armairuan gordeta

tximuak eta papagaiak kaxetan

horregatik ari naiz konkor hau hazten bizkarrean

txoko bat izateko neurea

aiztoak gordetzeko kutxa segurua

© Xabi Borda