DENBORAK BARREIATZEN DITU SENTIMENDUAK

        Goizalde Landabaso , 2005

Denborak barreiatzen ditu sentimenduak.

Ni ez naizen norbaitek

muga-epea ezarri zien.

Zuk agortu, ostera.

Zinemaskope aurreko pelikula da ordukoa.

Sol sostenido bako musika tresna

ikusle bakarra naiz eraistear dagoen zinematokian.

Ez naiz nintzena.

Tanttaka jausten diren amodio-malutak

ez dira nireak

ez desioa

ez samurtasuna

ez bat bilakatzen gintuen konplizitatea

ikusle bakarra naiz

aspaldi eraitsi zuten zinema zaharrean.

© Goizalde Landabaso