FANTASIA BAT

        Amaia Lasa , 1997

Autobusean zoazenean

itsasaldeko leihoan

eser zaitez

                beti.

Gauez

ilargia ateratzen denean

han

harkaitz hartan

Anbotoko Damia agertzen da.

Damia

Anbototik itsasoraino jaitsia

Greziatik etorri berria den

Saforekin solasaldi goxoan

                                  ihardutera.

Gau guztia igaro dute.

Goizaldean

autobusean

                  itsasaldeko leihoan

esertzen zarenean

poema hau jasoko duzu

                          zuretzat

                                        harkaitz hartan.

Autobusean zoazenean

itsasaldeko leihoan

                          eser zaitez

                                            beti.

Zure eguneroko egunerokotasuna

olatuetan

ito dadin.

© Amaia Lasa