OPERA PIANTO

        Lizar Begoña , 2022

Ibiliko gara oraindik

laranja koloreko olibondoen artean,

non enbarkazioa aparkatuta utzirik

Mediterraneo osoan Caruso entzungo den.

Kostalde ertzetik

ibiliko gara

minik gabeko Portugalera iristeraino

eta astroak, behingoz,

dagokien tamainan agertuko dira.

Iritsiko gara

egunez beltzak eta gauez zuriak

izan gaitezkeen lekura,

nahi ditugun jende-izenak hartzeko.

Paisaien antzera

mugituko gara arkitektura orotan

udaberri hasierako usainez,

munduen bilkura handienean.

Bizizaleen omenez

mozkorturik kantatuko dugu,

eta opera baten tankerako negarraldiekin

bukatuko ditugu arratsaldeak.

Iraganeko bizitzetan

eta datozen guztietan

egongo gara aldi berean,

Alephetatik elikatuz, heriotzatik janez,

jakiteko horietako zein izan den

egokitu zaigun hau,

eta nola igarotzen ari den ulertzeko

ibiliko gara oraindik

laranja koloreko olibondoen artean,

non enbarkazioa aparkatuta utzirik

Mediterraneo osoan Caruso entzungo den.

© Lizar Begoña