Egile berarenak:
MAITE ZAITUDALAKO
(1980)
ERRUSIAKO ESTEPETAN
(1987)
BIZITZA
(1987)
MUNDUA
(2007)
IRAULTZAK
(2007)
INDUSKETA
(2007)
ARITMETIKA ARIKETAK
(2007)
ABERRIAZ ZELAN AHAZTU
(2007)
GALTZEKO LURRAK
Jose Luis Otamendi , 1995
Bihotza zigor-zelda da guretzat, zigor-zeldak dira
Sailka litezkeen galerak pendizak
Sailka litezkeen inbentarioak, larderiaz jagondako bakea
Ikurretara ekarritako soraiotasun bulkadak
Izen bi behar genituzke denok etxe bi muga lerro bi maitasun bakarraren hegian tinkatuak
Ihesi denak ez ditzake entzun geratzeko egiten zaizkion deiak
Denok aldatu behar genuke ibilbidez txarrantxazko hesiok ebaki kostako bidean
Almitzari eskaini gorputz nekatuok maite dugunarengatik hil
Ni ari naiz ordea zuen poemak idazten
Ibai berean ikusten ditut flotatzen soinatal anitzak abantean
Neure ezintasuna eginen dut negar iheslarien lorratzak ezabatzeko
Gure nortasun agiriak eginen ditut negar ez da aise beratzen geroa
Gugaz bizi zarete
Gera zaitezte gugaz gau osoan bizitza osorako gugaz geratzera bazindoazte legez
Ez zaituztegu salatuko, orube berean maite izandako amesgaizto bi
Ez dizuegu opa akorduetan gure bihotza leher dakizuen
Ez dizuegu opa ezein patiotan desarmatzerik
Ez zaituztegu salatuko
Gure negarraz beste eginen dugu
Gure odolaz beste eginen dugu
Gure libertateaz beste —bonsai irendu hori—
Gu bakarreko lurraz beste eginen dugu alde biko ibaiez beste
Orain hau kitatzekotan ederra behar du zuen geroak
Zuek ez dituzue inoiz nire poemak idatziko
© Jose Luis Otamendi
| anonimoak |
| mendeak |
| 15 |
| 16 |
| 17 |
| 18 |
| 19 |
| 20 |
| 21 |
| poemen aurkibide alfabetikoa |