AS TIME GOES BYE

        Joxerra Garzia , 1991

eta behin berriro itxiko dira

night clubeko ateak

eta behin berriro hedatuko da

bakardadearen lurrin mingotsa

maiteminduaren begietan

eta behin berriro eseriko da

piano beltzaren albora

eta behin berriro aginduko dio

pianojole beltzari

behin eta berriroko pieza hura

behin berriro jotzeko, Sam,

as times goes bye

eta behin berriro hunkituko dira

ikusleen bihotzondoak ilunpean

eta azken ilarako neska gazteak

eskua hartuko dio mutilari

joan doan denbora geratzearren

eta elkarri musu emango diote

—geroaren nostalgia uxatzeko konjururik zaharrena—

eta maitasun historia berri bat

inauguratuko dute

eta behin berriro airatuko da maitasuna hegazkinez

eta behelainoak estaliko du aireportua

eta THE END

eta behin berriro sartuko dira maitale berriak

zinema pareko night club hartara

© Joxerra Garzia