ETSI FALTSUARENA

        Maialen Berasategi Catalan , 2021

 

 

           I

 

Bai, konturatu naiz.

Baina ez, eskerrik asko.

Banezake, baina ez dakit

biharraz hizketan.

To eta no eskribitzailearen

edukazio geldia:

“Aukeran nahiago ez”.

Altzariak ez dira sekula

geroaz mintzatzen.

 

Segi zuek geroaldian aritu uste

eta subjuntibo eternal horretan mintzo

segi zuek adokinetan ibili uste

eta istinga eder horretan ibilian.

 

Eta entzungor egin niri.

 

Bakardadearen errapetik

anestesiatu denaren

ajea baino ez daukat.

 

Eta bai, konturatu naiz

ajea esan dudala baina

ez zaitezte engaina zeren

biharamunaz aritzea

atzoaz aritzeko

modu diskretu bat baino ez da.

 

 

           II

 

Kontua ez da bizi ala iraun.

Bizi ala iraun polita da

indarra du

lelo bat da

baina kontua egiatan da

iraun ala etsi

(eta bake santua eman).

 

Antonimo ez dira

sinonimo ere ez:

badirauenak ez du etsi

ezta gezurretan ere.

 

           III

 

Ez naiz ez

senti bezain heldua.

Oraindik ere kanika-zuloetan

jolasean darabilt

etsi faltsuaren luxua.

 

© Maialen Berasategi Catalan