GAUMINA

        Gerardo Markuleta , 2015

Hiri zaharreko muinoan,

taberna-zulo zabaltxo batean,

astelehen gau burutxurian,

musika, alkohola eta belar finak.

Lau bat dozena lagun.

Honezkero inor gutxik beteko ditu

hogeita hamar udaberri.

Gauerditik aurrera,

orduak txikitzen hasiak,

erlojuen malguki eta torlojuak

nasaitu, eta badirudi baretzen

dela haien lasterraldia.

Begiek, ke adarretatik

onik ateraz gero,

kontsolamendurako

bidean jartzen zaituzte.

Gogo-mingainetan, berriz,

eztia eta gatz-ozpindua.

Kanpotik ikusita, ezohiko

musika-emanaldia dirudi;

baina, izan, hartu-emana da.

Hara ezin joandakoan,

handik etxera bidean,

harrapatzen gaitu gauminak.

© Gerardo Markuleta