AGUR, EUZKADI

        Emeterio Arrese , 1924

Arratsalde da.

Itsasoan arki naiz.

Urruti... doi, doi,

lainotsu dager

Auñamendiko erpin lerroa;

ubelantz ene

aberri polit

maitagarria...

oroi ederren kabi gozoa.

Itxasoaren

murmur hotsa gain

kaio bakar bat haruntz dihoa;

ta... noralderik ez dun

antxeta bezin larri

bihotzaren kai bila

artega dabil nere gogoa,

Eguzkiaren

biribil soila zeharo gorri...

Hodeiak sutu dira;

itzalune bat

une guzia izain da sarri.

...Hega lehikorraz nere

dardar-txoria

sorterriaren

kolkora doa hagitz urduri,

eta itsasontzi hau

ke mordoil usu

beltza botaka

biziro zorrotz aurrera beti.

...Arratsa dator;

odei naspilak

lozorro baten eraz dagertzi.

Goibel hau etsai-ozin...

Ipasterreko

mendatz bat ere

nahi arren ezin...ezin ikusi!

... 

Begietan nik orain

gau illunaren

illun sakona;

oroitzez baña gogoan argi!

—Agur txoko maitea,

ene laztana...

biotz-biotzez agur, agur, Euzkadi!

© Emeterio Arrese